Rubem Centeno Paradela

Fugar-se. Isso mesmo foi o que realizou Jean Genet. Frente ao nojento colonialismo praticado pola Geraçom Beat em Tanger, Genet decidiu desertar. Desertar das identidades sexuais para embarcar-se na amalgama de desejos e prazeres presentes na Zona Sotádica e enrolar-se na yihad queer. De Antioquia a Aleppo, de Aleppo a Damasco, e de Damasco às bases fedajim em Amman. Trataria de seguir Jean Genet a estela de de Sergius e Bacius?

Fugar-se. Juntar a Óscar Wilde, a Fassbinder, a Passolini, a Foucault, a Bowles, a Cadinot, a Gaultier e a Yves Saint-Laurent. Juntá-los num despacho e espetar-lhes: estúpidos! Vós que conhecestes e desfrutastes os prazeres da Zona Sotádica, vós, que desde as vossas experiências norteafricanas estávades numha posiçom privilegiada para minar o régimem sexual, vós, idiotas, desde as vossas ocidentais, nom comprendestes nada!

Juntá-los num despacho, pór-nos no meio deles, e fazer-nos estoupar umha cárrega explossiva adosada ao corpo, como faria um fedaijine numha reuniom de generais isaelitas.

Fugar-se e afirmar que nom somos de aqui. Como Joseba Sarrionandia.

As relaçons homossexuais, normais nas culturas mediterrâneas que aflorarom à luz da Grécia Clássica, parte indisolúvel da educaçom militar e das velhas culturas mediterrâneas, começarom a ser desterradas e borradas coa consolidaçom da cultura judeu-cristiá.

Primeira indagaçom: que ocorreu naqueles espaços da cultura mediterrânea onde o cristianismo nom logrou impór a sua hegemonia? A qüestom é comprendermos como certos espaços autónomos ‘queer-sotádicos’ puderom permanecer e desenvolver-se em sociedades islamizadas e como boa parte da constituiçom contemporânea europeia do desejo homoerótico (de Genet a Fassbinder, de Wilde a Passolini, de Cadinot a Goytisolo) constiui-se apartir do ‘descobrimento’ e da entrada em contacto do primerio Orientalismo europeu com esses espaços.